23:39 / 31.12.2015
11612

Dubay markazidagi mehmonxona binosida yong‘in chiqdi

BAAning Dubay shahridagi osmono‘par binolardan biri, Address Downtown nomli mehmonxona binosida Yangi yil bayramiga bir necha soat vaqt qolganida yirik yong‘in boshlandi. Bu haqda Al Jazeera telekanalida ma'lum qilindi.

Bu yong‘in dunyodagi eng baland bino bo‘lmish «Burj Xalifa» ro‘parasidagi binoning 20-qavatida yuz bergan. Yong‘in tez orada yuqori qavatlarga tarqalgan. Address Downtown mehmonxonasining umumiy balandligi 63 qavat.

Yuzlab kishilar zudlik bilan evakuatsiya qilingan. Oxirgi ma'lumotlarda yong‘in tufayli  14 kishi yengil jarohatlar olgani aytilgan.

Politsiya hudud atrofini o‘rab olgan. O‘t o‘chiruvchilar va vertolyotlar yordamida yong‘in o‘chog‘i bartaraf etilgan. Binoning qolgan qismlaridagi kichik yong‘inlarni o‘chirish ishlari davom etmoqda.

Yong‘in sabablari hozircha aniqlanmagan.

Top