Flash ad ID:1

O‘zbekiston Bosh prokuraturasi “MTS”ni jamoatchilikka yolg‘on axborot berishda aybladi


“MTS-O‘zbekiston” ofisi © delovoygorod.com

“O‘zdunrobita” XKning moliyaviy-xo‘jalik faoliyatini tekshirish bo‘yicha jinoiy ish qat’iy qonun doirasida olib borilmoqda. O‘zbekiston Respublikasi Bosh prokuraturasining 20-iyul kuni e’lon qilingan press-reliziga ko‘ra, tekshiruvlar reviziyalarni o‘tkazish bo‘yicha chiqarilgan qarorlar asosida o‘tkazilmoqda va tekshirilayotgan xo‘jalik yurituvchi subyekt rahbarlari tegishli tartibda bu qarorlar bilan tanishib chiqishgan.

“Tergov jarayonlarida jinoyat-protsessual qonunchilik talablariga to‘la rioya qilinmoqda. Ish bo‘yicha ayblanuvchilarning har biri himoya huquqidan foydalanilishi ta’minlangan, hech bir tergov harakati advokatlar ishtirokisiz amalga oshirilgan emas, ayni vaqtda, tergov jarayonida advokatlar tomonidan hech qanday e’tiroz va shikoyatlar tushgani yo‘q”, – deyiladi prokuratura xabarida.

Xabarga ko‘ra, “MTS-O‘zbekiston” rahbarlaridan biri hisoblangan, Rossiya Federatsiyasi fuqarosi Radik Dautov ishtirokidagi tergov jarayonlari Toshkentdagi Rossiya elchixonasi vakillari ishtirokida olib borilmoqda, elchixona tergov jarayoni bo‘yicha, O‘zbekiston Tashqi ishlar vazirligi orqali, doimiy xabardor qilib turilibdi. “[Dautov] saqlanayotgan joyga diplomatlar va himoyachilar hech bir cheklovlarsiz tashrif buyurishmoqda”, – deyiladi press-relizda.

Bosh prokuratura tergov jarayonida hamkorlikka tayyor ekanligini bildirar ekan, “MTS” maqsadli ravishda vaziyatni sun’iy keskinlashtirish va unga siyosiy tus berishga harakat qilayotganini qayd etgan. Xabarda prokuratura protsessual qoidabuzarliklarga yo‘l qo‘yayotgani haqidagi “MTS” tarqatgan gaplar asossiz ekanligi aytilib, Rossiya kompaniyasi jamoatchilikga “xorijiy investor siqib chiqarilmoqda” qabilida yolg‘on axborot berayotganligi ta’kidlangan.

“MTS” 13-iyul kuni e’lon qilgan press-relizda Bosh prokuratura noqonuniy ravishda kompaniya moliyaviy-xo‘jalik faoliyatini tekshirayotgani, hibsga olingan kompaniya xodimlariga himoyadan foydalanish uchun imkon berilmayotgani va boshqalar haqida xabar berilgandi. “MTS” OAJning bu pozitsiyasi kompaniya rahbariyatining ish bo‘yicha haqiqatning yuzaga chiqishidan manfaatdor emasligini yorqin ko‘rsatmoqda va o‘z sho‘basidagi ishlarning haqiqiy ahvolini yashirish istagida ekanligidan guvohlik bermoqda”, – deyiladi Bosh prokuratura xabarida.

O‘z navbatida, O‘zbekiston Respublikasi Bosh prokuraturasi tergov jarayoniga bosim o‘tkazishga urinishlarni imkonsiz va nojoiz deb baholab, OAVni tergov jarayonini haqqoniy yoritishga chaqirgan. Buning uchun tergov organi tomonidan tergov jarayonlari shaffof o‘tishi uchun jamoatchilik va matbuot prokuratura rasmiy sayti tomonidan boxabar qilib boriladi.

“MTS-O‘zbekiston” rahbarlariga qarshi tergov jarayoni iyun oyida boshlangan bo‘lib, kompaniya boshqaruv tizimida yuzaga kelgan jinoiy guruhning xatti-harakatlari natijasida iqtisodiyotga yetkazilgan zarar miqdori 500 milliard so‘mdan oshib ketgan.

2012-yilning 17-iyul kuni, Toshkent vaqti bilan 18:00da “MTS-O‘zbekiston”ning harakat litsenziyasi O‘zAAA tomonidan 10 ish kuniga to‘xtatildi. Bunga DAI tomonidan berilgan ko‘rsatmalarning bajarilmagani sabab bo‘ldi.

17-iyul kuni “MTS” rasmiy saytida e’lon qilingan navbatdagi press-relizga ko‘ra, kompaniyaning O‘zbekiston sho‘basi nazorat organning barcha ko‘rsatmalarini bajargan. 20-iyul kuni O‘zAAA e’lon qilgan navbatdagi press-relizga ko‘ra, “MTS-O‘zbekiston” ko‘rsatmalarni to‘liq bajarmagan.

20-iyul kuni “MTS” bosh kompaniyasi blog-kotibi Marina Akulich “MTS-O‘zbekiston”ning Feysbukdagi sahifasi orqali ma’lumot tarqatib, O‘zAAAning “aloqani bosqichma-bosqich o‘chirish” to‘g‘risidagi ko‘rsatmasini bajarish texnik jihatdan imkonsiz bo‘lganini ma’lum qildi. Shuningdek, Akulichning so‘zlariga ko‘ra, Milliy bank “MTS-O‘zbekiston”ning hisob raqamlarini muzlatib qo‘ygan va bu harakatni asoslovchi yoki tasdiqlovchi birorta hujjat taqdim etmagan. Bu borada hozircha Milliy bank biror bayonot bergani yo‘q.

© 2012 - 2014 Kun.uz
Ахборотдан фойдаланганда Kun.uz’га манба кўрсатиш шарт.
№0987 сонли ОАВ (веб-сайт) давлат рўйхатидан ўтказилганлиги тўғрисидаги гувоҳнома.

Система Orphus