O‘zbekiston prezidentining o‘z belgisi va shtandarti joriy qilinadi

Adliya vazirligi Jamoatchilik bilan aloqalar bo‘limi xabariga ko‘ra, qonun loyihasi bo‘yicha adliya vaziri Ruslanbek Davletov o‘z ma'ruzasi bilan ishtirok etdi. 

Ta'kidlanishicha, qonun loyihasi bilan O‘zbekiston prezidentining farqlovchi belgilari, ya'ni o‘z belgisi va shtandarti (bayrog‘i) yuzasidan qoidalar kiritilmoqda.

Xorijiy davlatlarda davlat rahbarining o‘z belgisi va shtandarti yangi saylangan prezidentga qasamyod qabul qilgandan keyin topshirilishi belgilangan. O‘zbekiston qonunchiligida ushbu masalalar tartibga solinmaganligi bois, qonunchilikni tegishli mazmundagi norma bilan to‘ldirish taklif etilmoqda.

Ushbu tartib lavozimga saylangan shaxsni prezidentlik lavozimiga yuklatilgan murakkab vazifalarni samarali amalga oshirishiga xalq va jamiyat tomonidan bildirilgan ishonch belgisi sifatida xizmat qilishi ta'kidlandi.