Moskva shahri va viloyatida kuchli jala vaqtida uch kishi halok bo‘ldi

Moskva shahri va viloyatida yuz bergan kuchli jala vaqtida uch kishi halok bo‘ldi va kamida besh inson jarohat oldi. Bu haqda Lenta.ru huquq-tartibot idoralaridagi manbaga asosan xabar berdi.

Uning so‘zlariga ko‘ra, Yangi Moskva hududida kuchli shamol natijasida yuk mashinasidan beton halqa tushib ketgan. U ikki erkakni bosib qolgan. Ulardan biri hodisa joyida hayotdan ko‘z yumdi, ikkinchisi tez yordam mashinasida vafot etdi.

Bundan tashqari, Dmitrovda soat 14:00 da 33 yoshli erkakni yashin urdi, u ham halok bo‘ldi.

Moskvada hozircha uch inson jabrlangani haqida ma'lumotlar bor: Mironov ko‘chasida shamol tufayli qulagan daraxt 50 yoshli ayolning ustiga tushgan, u shifoxonaga olib ketildi. Glavnaya alleya ko‘chasida ham ikki kishi – erkak va ayol daraxt qulashidan jabrlandi.

Moskva viloyatining Ramenskoye shahrida daraxt ikki ayolni bosib qoldi. Ular ham shifoxonaga yetkazildi.