«Bu juda noto‘g‘ri qadam» - Yevropa yetakchilari Trampdan norozi

Al-Qudsning maqomi mintaqaviy ishtirokchilar tomonidan aniqlanishi kerak, bu qaror avvaldan qabul qilinishi lozim emas, deya ma'lum qildi GFR TIV rahbari Zigmar Gabriel. Avvalroq AQSh prezidenti Donald Tramp Al-Quds Isroil poytaxti deb tan olinishini e'lon qildi.

"Al-Qudsning maqomi mintaqaviy ishtirokchilar tomonidan aniqlanishi kerak. Bu qaror avvaldan qabul qilinishi lozim emas. Bizning pozitsiya o‘zgarishsiz qoladi. Biz “ikki davlat” yechimi tarafdorimiz", - deya aytib o‘tgan vazir. Uning so‘zlarini esa GFR TIV Twitter ijtimoiy tarmog‘idagi rasmiy sahifasida keltirgan.

GFR kansleri Angela Merkel AQSh prezidenti Donald Trampning al-Quds bo‘yicha bayonotini qo‘llab-quvvatlamadi, shaharning maqomi ikki davlat konsepsiyasi doirasida aniqlanishi lozim, deya xabar berdi GFR vazirlar mahkamasi rasmiy vakili Shteffen Zaybert Twitter’dagi o‘z mikroblogida.

"Kantsler Merkel Trampning al-Quds bo‘yicha bayonoti haqida: federal hukumat bunday pozitsiyani qo‘llab-quvvatlamaydi, sababi al-Qudsning maqomi ikki davlat yechimi doirasida muhokama etilishi lozim", - deya yozgan Zaybert.

Fransiya prezidenti Emmanuel Makron ham Trampning al-Qudsni Isroil poytaxti sifatida tan olish bo‘yicha qarorini qoralab chiqdi, u xalqaro huquq va BMT rezolyutsiyalarining buzilishi bilan qabul qilindi.

"Ushbu qaror afsuslarga sabab bo‘ladi, u xalqaro huquq va BMT rezolyutsiyalarining buzilishidir, Fransiya buni qo‘llab-quvvatlamaydi", - deya aytib o‘tdi Makron Jazoirdagi matbuot anjumanida.

Uning yana bir bor ta'kidlashicha, al-Qudsning maqomi bo‘yicha masala Isroil va Falastin o‘rtasidagi muloqot davomida hal etilishi kerak.

Makron shuningdek barchani, xususan, arab davlatlari yetakchilarini xotirjamlik va vazminlikka chaqirdi. "Men barchani xotirjamlik va mas'uliyatga chaqiraman. Biz zo‘ravonlikdan qochish va muloqotni ta'minlash uchun barcha narsani qilishimiz darkor", - deya aytib o‘tdi Fransiya prezidenti.

Yevroittifoq ham Donald Trampning AQSh elchixonasini Tel-Avivdan al-Qudsga ko‘chirish va ushbu shaharni Isroil poytaxti sifatida tan olish bo‘yicha qaroridan jiddiy xavotirda hamda mintaqadagi barcha tomonlarni vazminlikka chaqiradi. Bu haqda YeI diplomatiyasi rahbari Federika Mogerini ma'lum qilgan.

"Yevropa Ittifoqi AQSh prezidenti Donald Trampning al-Quds bo‘yicha bugungi qaroridan jiddiy xavotirda, u tinchlikka erishish bo‘yicha istiqbollarga jiddiy ziyon yetkazishi mumkin", - deya ma'lum qilgan Mogerini.

Uning so‘zlariga ko‘ra, "YeI pozitsiyasi o‘zgarishsiz qoladi". "Har ikki tomonning harakatlari amalga oshishi kerak, oldinga yo‘l esa al-Quds maqomini har ikki davlatning bo‘lajak poytaxti borasidagi muzokaralar orqali topilishi lozim", - deyiladi YeI diplomatiyasi rahbarining bayonotida.

Uning so‘zlariga ko‘ra, "YeI va unga a'zo davlatlar al-Quds bo‘yicha xalqaro konsensusga rioya etishda davom etadi, u, xususan, BMT Xavfsizlik Kengashining 478-rezolyutsiyasida yozib qo‘yilgan. Unda al-Quds maqomi bo‘yicha yakuniy qaror qabul qilinmagunga qadar diplomatik vakolatxonalarning joylashishi ham belgilab berilgan".

"YeI barcha tomonlarni xotirjamlik va vazminlikka chaqiradi, bu keskinlikning oldini olishda kerak. To‘g‘ridan-to‘g‘ri va muhim muzokaralar uchun sharoitlar yaratishga e'tibor qaratish lozim, ular yakuniy maqom bo‘yicha barcha masalalarni hal qilishi mumkin", - deya ma'lum qildi Mogerini.

AQSh prezidenti Donald Tramp chorshanba kuni al-Qudsni Isroil poytaxti sifatida tan olishi haqida ma'lum qildi. Shaharning sharqiy qismiga falastinliklar da'vogarlik qilib keladi.

Isroil al-Qudsni, jumladan, Iordaniyadan yarim asr avval egallab olingan uning sharqiy tumanlari va tarixiy markazini o‘zining “yagona va ajralmas” poytaxti sifatida e'lon qildi. Jahon hamjamiyati bosib olish holatini tan olmaydi va shahar maqomini Yaqin Sharqdagi mojaroning eng asosiy muammolaridan biri sifatida ko‘radi. Shu sababdan barcha xorijiy elchixonalar Tel-Avivda joylashgan.
 AQSh Kongressi 1995 yilda Isroildagi elchixonani Tel-Avivdan al-Qudsga ko‘chirish haqidagi qonunni qabul qilgan. Biroq shaharning bahsli maqomi va bu holatning arab-musulmon dunyosi bilan munosabatlardagi o‘ta nozikligi inobat olinib barcha amerikalik prezidentlar, jumladan Tramp ham, har yarim yilda bu qarorning bajarilishini ortga surib kelgan.