Kun.uz: Непалнинг шимолида қутқарувчилар зилзила содир бўлгандан кейин 7 кун ўтиб, 101 ёшли тирик қолган эркак кишини чиқариб олишди.
Бу ҳақда 3 май куни маҳаллий полиция хабар берди. Полиция вакилининг маълумотларига кўра, Арун Кумар Сингх исмли бу кекса 2 майда ўз уйи харобалари остидан топилган. У ҳозирда шифохонада қолмоқда, деб хабар бермоқда “Франс Пресс” ахборот агентлиги.
Аввалроқ, Непал ҳукумати вайроналар остидан тирик қолганларни топишга умид қилмаётгани ҳамда қутқарувчилар етиб бориш қийин бўлган ҳудудларга борганларидан кейин қурбонлар сони кескин ошиши мумкинлигини айтган эди. 3 майда Непалнинг шимоли-шарқий қисмида ҳам бир эркак ва икки аёл топилгани маълум қилинганди. Непалда 2,8 млндан зиёдроқ одам зилзила туфайли ўз уйларини тарк этишган.
Охирги маълумотларга кўра, зилзила оқибатида 7 мингдан зиёдроқ киши ҳалок бўлган, 14 мингдан зиёдроғи жароҳат олган.