Kun.uz: Россиянинг Нижний Новгород шаҳрида фаолият юритувчи тадқиқотчилар гуруҳи суяк ўрнини босувчи цемент моддасини яратишга муваффақ бўлишди. Бу ҳақда Волгабўйи Федерал тиббий тадқиқот маркази илмий ходими Антон Новиков ТАСС агентлигига маълум қилди. Шу пайтгача Россияга суяк ўрнини босувчи модда АҚШдан олиб кирилар эди. Эндиликда унинг муқобили Россиянинг ўзида яратилди. “Бизнинг цементимиз, АҚШда ишлаб чиқарилган муқобилидан фарқли равишда, заҳарли моддалар ажратмайди ва инсон суяги структурасини тўлалигича такрорлайди”, - таъкидлаб ўтди тадқиқотчи. Суяк ўрнини босувчи цемент форполимер асосидаги синтетик материалдир: айнан шу модда туфайли у суяк билан бирика олади. Новиковнинг сўзларига қараганда, ушбу модда ёрдамида аллақачон 80дан ортиқ жарроҳлик амалиёти ўтказилган. “Бизнинг модда ёрдамида 30 см кубгача бўлган суяк участкаларини тиклаш мумкин. Уни нейрожарроҳликда ҳам муваффақият билан қўллаш мумкин. у 10-15 йил мобайнида суяк билан бирикиб боради”, - дейди олим. Шунингдек, ушбу модда АҚШда ишлаб чиқариладиган муқобилига нисбатан анча арзонроқ ҳамдир: АҚШдан етказиладиган модданинг бир пакети 80 минг рубль турса, Россияда ишлаб чиқарилганининг шунча миқдори учун 18 минг рубль тўлаш кифоя.
