Kun.uz: “Главная сцена” мусиқий лойиҳасининг ғолиби Сардор Милано UZ24 сайтига берган интервьюсида Тошкентга концерт дастури билан ташриф буюриш нияти борлигини
айтиб ўтди.
“Мен Ўзбекистонга дўстлар ва қариндошлар билан кўришиш учун тез-тез келиб тураман, мусиқий материал устида айнан Тошкентда ишлайман; бу ерда ишлаш осон”, - деб таъкидлади у.
“Мен Тошкентга концерт дастури билан ташриф буюришни истайман, - қўшимча қилди санъаткор. – У ерда мухлисларга тўла зални кўришга ва уларга чинакам мусиқа байрамини тақдим этишга умид қиламан”.
“Менинг болалигим Тошкентда кечган. Инглиз тилига ихтисослашган 178-умумтаълим мактаби, мусиқа мактабининг фортепиано синфи. Болалигимнинг муҳим қисмини “Аловуддин” эстрада шоу-студиясидаги иштироким ташкил этади, мен айнан ўша ердан ўз ижод йўлимни бошлаганман”.
Ёш ижодкор ўзбек хонандалари уни қўллаб-қувватлаганидан мамнун эканлигини таъкидлаб ўтди:
“Ўзбек эстрадаси юлдузларининг мени қўллаб-қувватлаганидан жуда хурсанд бўлдим. Улар орасида Райҳон Ғаниева, Сардор Раҳимхон, Лариса Москалёва, Рашид Ҳолиқов, Лайло Галиева (“Сетора” гуруҳининг биринчи таркибидан), Шукур (“Фазо” гуруҳи) кабилар бор. Интервьюларимдан бирида Тошкентга келганимда улар билан шахсан танишишни хоҳлашимни айтиб ўтган эдим”.
Шунингдек, Сардор Милано келажакдаги режаларига тўхталиб ўтди:
“Продюсерлардан таклифлар келиб тушмоқда, бундан жуда хурсандман. Бунинг тафсилотларини ҳозирча баён қила олмайман, яқинда ўзингиз ҳаммасини билиб оласиз”.
