Эроннинг “Тракторсози” нотўғри маълумот туфайли мамлакат чемпионлигини қўлдан бой берди. Бу ҳақда Эрон телеканалларига таянган ҳолда Milli.az портали хабар берди.
Сўнгги турда турнир жадвалини бошқариб келаётган “Тракторсози” Теҳроннинг “Нефть” жамоаси билан ўйин ўтказди. Айни замонда бўлиб ўтаётган “Сайпа” ва “Сепаҳон” жамоалари ўртасидаги баҳснинг якуни чемпионлик тақдирига бевосита таъсир ўтказар эди.
Ўйиннинг охирги дақиқаларида “Тракторсози” мураббийларига ва футболчиларига “Сепаҳон”нинг дуранг ўйнагани ва чемпионлик уларга насиб этгани ҳақида хабар етказилди. Бунинг натижасида футболчилар ўзини чемпион деб ҳисоблаб, ҳисобни ўзгартиришга ҳаракат қилмади ва ўйин 3:3 ҳисоби билан якунланди.
Иккинчи ўйинда эса аслида “Сепаҳон” “Сайпа” устидан 2:0 ҳисоби билан ғалаба қозонган эди. Шу тариқа “Сепаҳон” чемпионликни қўлга киритди.
