«Реал» футболчилари клубнинг "Microsoft" компанияси билан ҳамкорлик шартномаси имзоланиши муносабати билан ташкил этилган тантанали маросим вақтида Флорентино Перес билан гаплашишди. Бу суҳбатда жамоа бош мураббийи Карло Анчелоттининг келажаги муҳокама қилинган.
Футболчилар 55 ёшли италиялик мутахассисни қўллаб-қувватлашган ва уни истеъфога чиқармасликни клуб президентидан илтимос қилишган.
«Мураббийлар ўз соҳасининг билимдони бўлишдан ташқари инсоний хусусиятларга эга бўлса, бу менга ёқади. Анчелотти шундай инсон», – деди Серхио Рамос.
Криштиану Роналду ҳам бу мураббий билан ишлаётганидан мамнунлигини билдирган.
«Анчелотти юмшоқ инсон эмас. Унинг қўлостида биз Моуриньо даврига нисбатан кўпроқ ишлаяпмиз», – дейди Пепе.
«Ўйинчилар билан яқин муносабатда бўлиш Анчелоттини ўзига хос инсонга айлантиради», – деди Гарет Бэйл.
«Қарор қабул қилиш ҳуқуқи менда бўлганида, мен уни танлаган бўлардим», – деди Марсело.
Тони Кроос ҳам жамоадошлари каби мураббийни қўллаб-қувватлади ва «Анчелотти – чемпион» деб фикрини ифодалайди.