Ўзбекистон Халқ артисти Юлдуз Усмонова Asia Plus нашрига берган интервьюсида героин билан қўлга тушгани ҳақидаги хабарни инкор қилди.
Маълумки, бир муддат олдин тожикистонлик журналистлар Юлдуз Усмонованинг героин олиб кетаётганида қўлга тушгани ҳақидаги хабарни тарқатган эди. Хонанда бу борадаги гап-сўзларга чек қўйишга қарор қилди.
“Бу газета бизнинг журналистларимиздан бирининг қўлига тушиб қолди, у ерда жуда хунук сарлавҳа қўйилган экан – “Юлдуз Усмонова героин билан қўлга тушдими?”; журналистимиз мендан бу ҳақда сўрай бошлади, шундан сўнг биз жавоб беришга қарор қилдик, – унинг сўзларини келтиради газета. – Тушунаман, шовшувли сарлавҳалар керак, лекин, дўстлар, журналист аҳлоқини унутманг. Ўзларингизни қаҳрамонларингиз ўрнига қўйиб кўринг. Шахсан менга бу жуда оғир ботди. Мен Марсдан тушмаганман, яхши биламан, айрим журналистлар шовшув йўлида мутлақо ишончсиз манбалардан ҳам фойдаланиши мумкин. Сиздаги (яъни Тожикистондаги) яна бир нашр менинг 6 йил муқаддам VIPzone журналига берган интервьюимни гўёки янги материал деб кўрсатишга ҳаракат қилганди. Мухлисларимга нотўғри ахборот етказиш нима керак? 2009 йилдан буён тожик журналистларига ҳеч қандай интервью бермаганлигимни расман эълон қиламан. Asia Plus бундан мустасно”.