Тошкентнинг Яшнобод туманида банк пластик карталаридаги маблағларни нақдлаштириб бериш баҳонасида турли шахслардан жами 17 млн сўм ўғирлаган фуқаро Собир Қудратов қўлга олинди.
Яшнобод туман прокурори ўринбосари Ботир Аглаевнинг “Ҳуқуқ” газетасига берган маълумотига қараганда, Умар исмли йигит 2014 йилнинг 2 август куни Қудратовга ўз пластик картасини бериб, ичидаги 9 482 000 сўмни нақдлаштириб беришни илтимос қилган. Қудратов картани олиб, ичидаги пулларни ечиб олган, аммо турли баҳоналар билан Умарни алдаб юраверган.
Орадан анча вақт ўтгач, Қудратовнинг қаллоблигини тушунган Умар ички ишлар органларига мурожаат қилган.
Собир Қудратов қўлга олингач, илгарироқ у шу йўл билан у бошқа фуқаролар, жумладан, У. Абдуллаевга тегишли 2 202 000 сўмни, Г. Мавлоновга тегишли 5 150 000 сўмни ўзлаштиргани аниқланди.
Воқеа юзасидан жиноий иш қўзғатилди. Тергов давом этмоқда.
