Украина президенти Пётр Порошенко Варшавада футбол бўйича Европа Лигасининг “Днепр” ва “Севилья” ўртасидаги финал учрашувига бормайдиган бўлди. Украина раҳбарига майдонда Польшанинг на янги президенти, на эски президенти ҳамроҳлик қилишни истамади.
Польшанинг янги президентининг матбуот котиби “Президент Порошенко Польшага сафарини бекор қилди”, деб хабар берди.
Украина президенти “Днепр” ва “Севилья” ўртасидаги “аср учрашуви”га келишни мўлжаллаган эди. У майдондан туриб Польшанинг янги президенти Анжей Дуда билан украина клубига мухлислик қилмоқчи эди, у билан алоқалар ўрнатиб, юзма-юз гаплашмоқчи эди.
Бироқ Дуда Порошенко билан учрашув ҳақида олдиндан огоҳлантириб қўйилмаган, шунинг учун у бундан хабар топгач, бандлигини айтиб, Порошенко билан учрашишдан бош тортган.
Порошенко Дуда томонидан кўрсатилган беэътиборлик туфайлими ёки бошқа сабабларга кўра Польшага бориш фикридан қайтди.
Порошенконинг бу қарори украиналик футболчиларни қаттиқ ранжитиши мумкин, чунки Украинада шундай ирим бор: агар мамлакат президенти ўйинга ташриф буюрса, жамоага омад кулиб боқади.
Аввалроқ Порошенко Польшага мамлакатнинг янги президенти билан учрашиш мақсадида ташриф буюриши, ундан кейин Европа Лигасининг финал учрашувига бориши маълум қилинганди.