Испания ҳукумати АҚШ билан мудофаа борасида янги келишувга эришди. Эндиликда Морон-де-ла-Фронтерада жойлашган ҳарбий базага “Африкадаги инқирозларга жавоб қайтариш” мақсадида доимий равишда ҳамкорликда қўлланиладиган база мақоми берилди. Бу ҳақда мамлакат Вазирлар Маҳкамаси раисининг биринчи ўринбосари Сорайя Саэс де Сантамария маҳкама йиғилиши якунларига кўра мухбирларга берган баёнотида маълум қилди.
Янги келишувлар кейинги ҳафта бошида Испанияга АҚШ давлат котиби Жон Керрининг ташрифи чоғида имзоланади.
Морон-де-ла-Фронтера ҳарбий базасига АҚШ ҳарбий хизматчиларини киритиш борасидаги шартнома 1988 йили имзоланган. Шундан буён шартнома деярли ҳар йили узайтирилади. Бир пайтнинг ўзида базада жойлаштирилиши мумкин бўлган АҚШ ҳарбий хизматчилари сони 850 кишини ташкил қилади, аммо ихтилоф келиб чиққан пайтда уларнинг миқдори 1.1 минг кишига етказилиши мумкин.
Шунингдек, шартномага мувофиқ, базада АҚШнинг 12 транспорт самолёти, 4 ёқилғи қуювчи самолёти ва битта кўмакчи самолёт жойлаштирилиши мумкин.