Австралиянинг Northern Saints жамоаси футболчиси Муҳаммадали Жамил Аллуш ўйин чоғида юрак хуружига учраб, вафот этди. The Herald Sun нашрининг ёзишича, воқеа 30 май куни Мельбурн стадионларидан бирида Avondale Heights жамоасига қарши кечган учрашув чоғида содир бўлган.
Биринчи таймда гол урган Аллуш тўсатдан ўт устига йиқилган. 21 ёшли футболчига ёрдам кўрсатиш учун мураббийлар ва тиббиёт ходимлари ошиққан. У оғир аҳволда шифохонага ётқизилган ва ўша ерда вафот этган. Унинг юрак хуружига учрагани аниқланди.
Футболчининг қариндошлари берган маълумотларга қараганда, Аллуш охирги пайтларда ортиқча вазн тўплаганидан безовта бўлиб, парҳезга кирган ва тренажер залига қатнай бошлаган эди.
