Sony компанияси муаммоли мобиль бизнесини қайта шакллантиришни давом эттирмоқда. Бу гал компания ишчи ўринларини қисқартиришга қарор қилди.
TechCrunch технопорталининг хабар беришича, Sony Mobile нинг Швециядаги филиалида 575 нафар доимий асосда ва 400 нафар ишбай асосда ишлайдиган ходимлар бўшатиб юборилган. Натижада маҳаллий офисдаги ходимлар сони деярли икки баробар камайиб кетди. Sony Mobile компаниясининг Швециядаги филиали дастурий таъминот ишлаб чиқариш ва Европадаги мижозларга хизмат кўрсатиш билан шуғулланади.
Япон гиганти ушбу филиалда иш ўринлари қисқартирилганини тасдиқлади ҳамда бу 2015 йил февралда эълон қилинган ходимлар таркибини қайта шакллантириш сиёсатининг бир қисми эканлигини қўшимча қилиб ўтди. Ўшанда Sony Mobile ўзининг бутун дунё бўйлаб жойлашган филиалларидан 5 минггача одам бўшатилишини маълум қилганди.
Маълумот учун, 31 март куни ёпилган 2014-2015 молиявий йил натижаларига кўра Sony охирги 7 йил ичида 6 марта 1 млрд доллардан кўпроқ соф зиён кўрди. Ўтган йили компаниянинг зарарлари 1,8 млрд долларни ташкил қилган эди, бу йили эса кўриладиган зарар 315 млн долларга баҳоланмоқда.