Киевнинг "Динамо" жамоаси мухлислари Украина Кубоги финалида "Шахтёр"га қарши ўтказилган ўйин давомида, ғолибни аниқлаш учун пенальтилар серияси амалга оширилаётган вақтда секторлардаги ўринларидан майдонга тушиб келишди.
Бу вақтда ҳисоб 3:3 бўлиб турган. Бироз кейинроқ мухлислар трибуналарга қайтарилган ва пенальтилар серияси давом эттирилган.
Пенальтилар серияси якунланиб, "Динамо" 5:4 ҳисобидаги натижа орқали ғалаба қозонгач, мухлислар яна майдонга тушиб келишган ва ғалабани нишонлаш пайтида дарвозалардан бирини синдириб ташлашган.
"Олимпийский" ўйингоҳидаги бу ўйинни УЕФА вице-президенти Александр Суркис, Украина футболи фахрийлари Александр Шовковский ҳамда Олег Гусев ҳам томоша қилаётган бўлган ва айнан улар оломондан майдонни тарк этишни илтимос қилишганидан кейин вазият барқарорлашган. Шундан сўнггина тақдирлаш маросими ўтказилган.
Бунгача эса 15 дақиқа давомида майдонда тартибсиз ҳолат давом этган.