Аргентинанинг «Бока Хуниорс» жамоасининг АҚШдаги 23 ёшгача бўлган футболчилардан иборат жамоаси таркибида ўзбекистонлик 20 ёшли футболчи пайдо бўлган.
Тоҳир Усмонов исмли бу ёш футболчи фейсбукдаги саҳифасида ўзининг шахси ва футболчилик фаолияти ҳақидаги баъзи маълумотларни ёзиб қолдирган.
Унга кўра, Тоҳир Усмонов 1994 йилнинг 24 ноябрида, Тошкент шаҳрида туғилган бўлиб, 9 ёшида оиласи билан АҚШга кўчиб кетган. У 14 ёшидан бошлаб Нью-Жерсидаги футбол мактабида ўқиш баробарида футболчилик фаолияти билан шуғулланганини ва «Olive» илк жамоаси эканини ёзган.
У бу жамоада 4 йил давомида ҳаракат қилган, футбол мактабини тамомлагач, Ўзбекистонга келган. У 2013 йилда «Пахтакор» жамоасининг ёшлари таркибида ўйнаган. 2014 йилда эса «Андижон» билан 1 йиллик шартнома имзолаган. Шартномаси муддати якунига етгач, Тоҳир Усмонов яна АҚШга қайтиб кетган.
У ўз фейсбукида 22 июнь куни «Бока Хуниорс-АҚШ» жамоаси билан шартнома имзолагани ҳақида маълум қилган.
Клубнинг твиттердаги аккаунтида ҳам футболчи билан шартнома тузилганини тасдиқловчи суратлар пайдо бўлган. Усмонов билан шартнома тузилиши ҳақидаги суратда «янги юлдузми?» дея таъриф беришган.