Жорий йилнинг 5 апрелида Россиянинг Ярославль шаҳрида Ўзбекистон фуқароси бўлмиш аёл пакет ичида гўдакни олиб ўтмоқчи бўлганда автобус ичида қўлга олинган эди. Уни Ўзбекистонга депортация қилиш ҳақида қарор қилинди. Бу ҳақда Ярновости агентлиги хабар бермоқда.
Аёл 90-рақамли йўналиш автобуси ичида кетаётганда унинг ёнидаги целлофан пакет ичидан боланинг йиғиси эшитилган. Автобус йўловчилари бу ҳақда ҳуқуқ-тартибот идораларига хабар берган. Воқеа жойига етиб келган ҳуқуқ-тартиботчилар пакет ичида 6 кунлик боланинг борлигини аниқлаган.
Аниқланишича, аёл туғруқхонадан қочиб кетган. Унинг ёнида ҳеч қандай ҳужжатлар бўлмаган.
Суд аёлни мамлакатда бўлиш тартибини бузганликда айбдор деб топди. У маъмурий жарима тўлайди, шунингдек, Россия ҳудудидан чиқариб юборилади.
Бундан ташқари, аёлга яқинда уч ойлик бўлган фарзандини кўриш имкони берилди. Болакай икки ойдан бери онасини кўрмагани боис уни танимади.
