Вritish Petroleum нефть компанияси Мексика бўғозида нефть тўкилиши ҳолати бўйича АҚШ ва бошқа давлатларнинг даъволарини ҳал қилиш доирасида яқин 18 йил ичида 18,7 млрд долларлик жарима тўлайди, деб ёзмоқда The Wall Street Journal нашри.
“Беш йил аввал биз ўз зиммамизга бўғознинг экологиясини тиклаш мажбуриятини олган эдик. Биз ушбу ваъдамизни бажариш учун фаол равишда иш олиб бормоқдамиз”, деб айтди ВР раҳбари Карл-Хенрик Сванберг.
BP акциялари бу янгиликдан кейин Лондон биржасида 4 фоизга кўтарилиб кетди.
2010 йилда Мексика бўғозида компанияга тегишли Deepwater Horizon нефть платформасида портлаш юз берган. Оқибатда 11 киши ҳалок бўлган эди ва платформадан денгиз сувига оқиб кетган нефтни 3 ой мобайнида тўхтатишнинг иложи бўлмаган. Бу вақт мобайнида бўғозга 4,9 млн баррель нефть оқиб кетган.