Тошкентдаги Жаҳон иқтисодиёти ва дипломатия университетида “Ўзбекистон Республикаси қонунчилигида БМТ конвенциясининг коррупцияга қарши имплементацияси” мавзусида илмий-амалий анжуман бўлиб ўтди.
“Туркистон-пресс” Миллий ахборот агентлигининг хабар беришича, анжуманда университет профессор-ўқитувчилари, докторантлари ва магистрлари иштирок этишди. 2015 йилнинг 20 июнида ўтказилган анжуманда, шунингдек, Ўзбекистон Бош прокуратурасининг маъсул ходимлари ҳам иштирок этган.
Анжуман иштирокчилари 2008 йилда мамлакат парламенти томонидан БМТнинг коррпуцияга қарши конвенцияси ратификация қилингандан кейин коррупцияга қарши курашда ижобий ўзгаришлар содир бўлганини қайд этишди. Шунингдек, Ўзбекистон Иқтисодий ҳамкорлик ташкилотининг коррупцияга қарши кураш бўйича ҳаракатларнинг Истанбул режасига қўшилгани таъкидлаб ўтилди.
Бош прокуратура вакили қайд этганидек, Ўзбекистонда коррупцияга қарши курашишнинг меъёрий-ҳуқуқий асослари, жумладан коррупция учун жавобгарлик механизмларини такомиллаштиришга катта эътибор берилмоқда.
Ўзбекистонда “2015 йилга мўлжалланган коррупцияга қарши тадбирларни амалга ошириш бўйича амалий ҳаракатларнинг комплекс режаси” қабул қилиниб, амалга оширилмоқда. Бу ҳужжат ўз ичига коррупцияга қарши курашишнинг институционал ва ташкилий-амалий механизмларини такомиллаштиришга қаратилган бир қатор катта миқёсдаги тадбирларни олади.
Хусусан, бундай тадбирлар орасида коррупция муаммосини ўрганувчи махсус тадқиқотларни тизимли равишда ўтказиш, бу масала бўйича жамоатчилик фикрини ўрганиш каби чора-тадбирлар бор. Бу чора-тадбирлар коррупцияга кўпроқ мойил бўлган соҳаларни аниқлашга, унинг вужудга келиш сабаблари, коррупцияга қарши курашиш бўйича чора-тадбирларни ишлаб чиқишга имкон беради.
Анжуман якунларига кўра ўқув жараёнига коррупцияга қарши курашиш бўйича таълим дастурларини самарали киритиш, бу соҳадаги миллий ва хорижий қонунчиликни чуқур ўрганиш бўйича тегишли тавсиялар қабул қилинди.