"Агар Кличко-Фьюри ўртасида ўта оғир вазн тоифасида жаҳон чемпиони унвони учун жангни ўтказиш бўйича аукцион бўлиб ўтганда ва унда россиялик промоутер Владимир Хрюновнинг таклифи ютганда ушбу жанг Грознийда бўлиб ўтиши мумкин эди", деб маълум қилинмоқда "Газета.ру" нашрида.
Учта жаҳон чемпиони камарига эга украиналик боксчи ва WBA версияси бўйича чемпионлик камари учун жанг ўтказишга мажбурий номзод ҳисобланган британиялик боксчининг вакиллари узоқ вақт давомида жангнинг ўтказилиши бўйича келишувга эриша олмаётганлари сабабли ташкилот ушбу жангни ўтказиш ҳуқуқини сотиш бўйича аукцион ўтказишга қарор қилди. Аукцион бошланишига оз фурсат қолганда Кличко ва Фьюри келишувга эришганларини ва жанг 24 октябрда Дюссельдорфда ўтказилишини маълум қилишди.
“Афсуски, иш аукционгача етиб бормади. Кличконинг вакили Том Лефлер мени кўриши билан Фьюрининг вакили Майк Хеннесининг шартларини зудлик билан қабул қилди. Улар аукцион бошланишига бир дақиқа қолганда битим туздилар. Бу ҳақда WBA президенти Жильберто Мендос маълум қилди”, деб айтмоқда россиялик промоутер Хрюнов ўзининг инстаграмдаги саҳифасида.
“Биз ушбу жанг учун таклиф қилган 18 242 232 доллар миқдоридаги маблағ таклифлар ичида энг каттаси эди. Ҳамкорим Умар билан бу жангни Грознийда ўтказиш имкониятини муҳокама қилган эдик”, деб қўшимча қилиб ўтди Хрюнов.
WBA шартларига кўра, жанг кимнинг фойдасига тугашидан қатъий назар Кличко умумий гонорарнинг 80 фоизини, Фьюри эса 20 фоизини олади.