Орол денгизининг Ўзбекистонга тегишли секторида Aral Sea Operating Company операцион консорциуми 2017 йилда углеводородлар конларида қазиб олиш ишларини бошлаб юбориши мумкин, деб хабар бермоқда Газета.уз.
Дастурда кўзда тутилган шартларга мувофиқ, 2017-2031 йилларда бу ишларга 300 млн доллар инвестиция киритиш кўзда тутилмоқда. Айни пайтда геология разведка ишлари якуний босқичга кирмоқда. 780 кв км участкада ўтказилган 3D-сейсморазведка ва дала ишлари 2014 йил мартида якунланган эди. Жорий йилда битта чуқур, 2016 йили эса яна иккита синов чуқури очиш режалаштирилмоқда.
2006 йил августида Ўзбекистон ҳукумати ва “Ўзбекнефтгаз” миллий холдинг компанияси, Россиянинг “ЛУКОйл Оверсиз”, Малайзиянинг Petronas, Кореянинг KNOC, Хитойнинг CNPC таркибидаги халқаро консорциуми ушбу 40 йиллик лойиҳани имзолаган эди. 2011 йил майида консорциумдан Petronas, 2013 йил сентябрида эса KNOC чиқди. Консорциумда “Ўзбекнефтгаз”нинг улуши 33.4, CNPC ва “ЛУКОйл”нинг улуши 33.3 фоиздан. Шартнома шартларига биноан Ўзбекистоннинг биринчи босқичдаги минимал улуши 50 фоизни ташкил қилади. Корхона 2007 йил январида ишга туширилди.
