Қиличбозлик халқаро федерацияси (FIE) президенти, миллиардер Алишер Усмонов Рио-де-Жанейрода бўлиб ўтадиган 2016 йилги Олимпия ўйинларидан кейин FIE га янги президентлик муддатига ўз номзодини қўйиш-қўймаслиги ҳақида қарор қабул қилади. Бу ҳақда Усмонов Москвада 14 июлда ўтказилган матбуот-анжуманида айтиб ўтди.
Москвада 13-19 июль кунлари қиличбозлик бўйича жаҳон чемпионати бўлиб ўтмоқда.
“Кўп нарса субъектив сабабларга боғлиқ бўлади. Ҳозирча бўлиб ўтадиган сайловларга истиқболдек қарамоқдаман. Олимпия ўйинларидан кейин якуний қарорга келаман”, деб айтди Усмонов ушбу ҳолат юзасидан.
FIE сайлов конгресси Рио-де-Жанейродаги Олимпиададан кейин Москвада бўлиб ўтади.
Алишер Усмоновнинг фикрича, FIE ўз спорт турини бутун дунё бўйлаб сермаҳсул ривожлантирмоқда.
“Жаҳон чемпионати иштирокчи давлатлари сони янада ошди: Қозонда 102та давлат иштирок этган бўлса, бу йили 108та давлат қатнашмоқда. Демак, биз қиличбозликнинг универсаллиги ва уни ёйиш, бутун дунё бўйлаб қиличбозлик оиласини кенгайтириш нуқтаи назаридан тўғри йўлда турибмиз. Олимпия ўйинлари олдидан ўтказиладиган жаҳон чемпионатининг қаерда ўтказилиши ҳам муҳим аҳамият касб этади. Ушбу чемпионатнинг ғолиблари катта эҳтимол билан Олимпия ўйинларида ҳам совринли ўринларни қўлга киритадилар. Бу ерда ҳаммага ўз маҳоратини кўрсатишни ва ўзларининг энг яхши натижаларига эришишни тилаб қоламиз”, деб айтди Усмонов.
“Биз Лотин Америкаси, Осиё ва Африкадан ғолиб давлатлар позицияларининг янада кучайишини кутиб қоламиз. Бизнинг вазифамиз иложи борича кенгроқ рақобатчиликни вужудга келтиришдан иборат. Рио-де-Жанейродаги ўйинлар бизнинг спорт туримизнинг ривожланишига янги туртки бўлади”, деб қўшимча қилди Усмонов.
FIE президенти қиличбозлик яна телеэкранларга қайтганини ва ушбу спорт турининг томошабоплигини ошириш ташкилотнинг устувор вазифаларидан бири эканлигини таъкидлаб ўтди.