Янги зеландиялик кинорежиссёр Мартин Кемпбелл "Хорижлик" (The Foreigner) номли триллерига бош рол ижроси учун Жеки Чанни таклиф қилди.
Мартин Кемпбелл "Олтин кўз" (Golden Eye, 1995) ва "Рояль казиноси" (Casino Royale, 2006) фильмлари билан танилган. Бу фильмларда Пирс Броснан ва Даниель Крейг жосус Жеймс Бонд ролларини ижро этишган.
Янги фильмнинг суратга олиш ишлари шу йилнинг октябрь ойида бошланиши айтилган. Картина 1992 йилда нашр этилган британиялик Стивен Лезернинг "Хитойлик" номли романи воқеалар асосида суратга олинади.
Асарда Лондондаги Чайна-таун ресторани соҳиби бўлган, қизи ирландиялик жиноятчилар томонидан ўлдирилган киши ҳақида ҳикоя қилинади. Жеки Чан айнан шу ота ролини ижро этади.