Украина Олий Радаси мамлакатда марказлаштиришни тугатиш борасида конституцияга президент Пётр Порошенко томонидан таклиф қилинган ўзгартишларни қабул қилди. Йиғилиш парламент сайти орқали трансляция қилинди.
Яқинда Порошенко Донбасснинг мақоми тўғрисидаги конституцион ўзгартишларни Олий Рада муҳокамасига киритгани ҳақида ахборот берилган эди.
1 июль куни киритилган лойиҳа матнида Донбасс тилга олинмаган эди, аммо таҳрирдан ўтган вариантда “2015 йил 12 февралидаги Минск келишувларини ижро этиш бўйича комплекс чора-тадбирлар” инобатга олингани таъкидланган.
Қонун лойиҳасини 288 нафар депутат қўллаб-қувватлади.
Овоз беришдан олдин Порошенко чиқиш қилди. Шундан сўнг депутатлар давлат мадҳиясини ижро этдилар.
