Тожикистон ҳукумати “ИШИД” террорчилик гуруҳи сафида ҳаракат қилаётган ўз фуқароларининг сони ошаётганидан хавотир билдирмоқда, деб хабар бермоқда “ТАСС” ахборот агентлиги.
Бу ҳақда Тожикистон Ички ишлар вазири Рамазон Раҳимзода маълум қилди.
Раҳимзоданинг айтишича, бундай фуқаролар сони 500 гачани ташкил қилмоқда. Уларнинг исмлари маълум бўлиб, мамлакат бош прокуратураси уларга қарши сиртдан жиноий иш қўзғатган. Раҳимзоданинг айтишича, тезкор маълумотларга кўра улардан 100 нафардан кўпроғи ҳалок бўлган.
Вазир ушбу ҳолат юзасидан имомлар ва маҳаллий фаолларни жалб қилган ҳолда аҳоли ўртасида тушунтириш ишлари олиб боришга чақирмоқда.
Тожикистон Миллий хавфсизлик давлат қўмитаси маълумотларига кўра, айни пайтда мамлакатнинг 1,5 мингга яқин фуқароси “ИШИД” сафига ўтгани ҳақидаги маълумот текширилмоқда.