22 июль куни Ўзбекистон меҳнат ва аҳолини ижтимоий муҳофаза қилиш вазири Азиз Абдуҳакимов Япониянинг Ўзбекистондаги элчиси Фумихико Като билан учрашди. Бу ҳақда вазирликнинг расмий сайти орқали маълум қилинди.
Айтилишича, учрашув чоғида икки томонлама алоқаларнинг келажакдаги истиқболлари, шунингдек, ўзбекистонлик стажёрларнинг Японияда тайёргарлик ўташи бўйича дастур ижросининг техник жиҳатлари муҳокама қилинди. Хусусан, Япония элчиси стажёрлар малакасини оширишга мўлжалланган мультимедиа материалларини тақдим этди. Уларда Япониянинг кундалик ҳаёти, йўл ҳаракати қоидалари, диққатга сазовор жойлари, ўзига хос жиҳатлари ҳақида ҳикоя қилинган.
Япония вакили қўшимча тарғиборт-ташвиқот ишларининг ўзбекистонлик меҳнат муҳожирларининг Япония корхоналарида сифатли иш ўринларини эгаллашларида муҳим аҳамият касб этиши ҳақида айтиб ўтди.
Шу мақсадда қўшма ишлар натижасида сайт ташкил этиб, унда Ўзбекистоннинг таълим тизими, ўқитиш даражаси ҳақида маълумот сақланади. Бу ўзбекистонлик ишчилар ҳақида Япония корхоналари тўлақонли маълумотга эга бўлиши ҳамда улар билан ҳамкорликка қизиқиш билдиришига хизмат қилади.
