ОАВлар маълумотларига кўра, Япониянинг Toshiba компанияси молиявий можаро оқибатида бўшатиб юборилган компаниянинг собиқ президенти Хисао Танаки ўрнини эгалловчи янги президент номзодини аниқлаштириб олди.
Reuters ахборот агентлигининг маълум қилишича, Toshiba ходимлар сиёсати қўмитаси Масаси Муромати номзодини компания президенти лавозимига таклиф қилди. Айни пайда Муромати компаниянинг президенти ва бош директори лавозимларини вақтинчалик бажариб келмоқда.
Маълумот учун, бир ҳафта аввал Хисао Танака аудиторлик текшируви у ва бошқа баъзи топ-менежерлар 6 йил давомида молиявий ҳисоботни шакллантиришда кўп сонли қоидабузарликларга йўл қўйганларини аниқлагандан кейин истеъфога кетишини айтган. Бухгалтерия ҳисоб-китобларига аралашиш йўли билан компания даромади 1,2 млрд долларга кўпайтириб айтилган.
Asahi Daily нашрининг маълумотларига кўра, 2015 йил сентябрда Toshiba акциядорларининг навбатдан ташқари йиғилиши бўлиб ўтади ва унда компаниянинг келгуси ишлари режаси маълум қилиниши режалаштирилмоқда.
Қайд этилишича, Масаси Муромати Toshiba раҳбари лавозимига ишончли ва лойиқ номзод ҳисобланади. Бундан ташқари, Муромати компанияни молиявий фирибгарликлар сабабли тарк этишга мажбур бўлган камида 8 нафар ҳамкасби каби бундай фирибгарликларга алоқаси йўқ номзод ҳисобланади.