АҚШ давлат котиби Жон Керри Қоҳирага сафари доирасида Миср президенти Абдулфаттоҳ ас-Сисий билан ИШИД гуруҳига қарши курашиш масаласи, шунингдек, Эрон билан эришилган ядровий келишув масалаларини муҳокама қилди. Бу ҳақда давлат департаменти вакили матбуот билан мулоқот чоғида маълумот берди.
Унинг сўзларига қараганда, Керри ва ас-Сисий Яқин Шарқдаги умумий вазият, шунингдек, Мисрда содир этилган терактлар ҳақида ҳам тўхталиб ўтишди. АҚШ дипломатияси раҳбари Мисрга ИШИДга, шунингдек, Синай ярим оролидаги террорчиларга қарши курашда ёрдам беришга тайёрлигини маълум қилди.
Шунингдек, у Венада Эрон ва воситачилар олтилиги вакиллари ўртасидаги музокаралар натижасида эришилган келишув минтақанинг бошқа давлатлари қаторида Мисрнинг ҳам хавфсизлигини таъминлашини таъкидлаб ўтди.
