Беларусь президентлик сайловларига номзод сифатида мамлакатнинг амалдаги раҳбари Александр Лукашенкони кўрсатиш бўйича ташаббускор гуруҳ аллақачон 500 мингдан ортиқ имзо тўплашга эришди, деб хабар беради МСҚ раиси Лидия Ермошина.
“Бугунги кунга келиб ҳудудий комиссияларга Александр Григорьевич Лукашенко номзодини қўллаб-қувватловчи 538 минг имзо келиб тушди”, – деди у журналистлар билан мулоқот чоғида.
Шунингдек, комиссияларга Беларусь либерал-демократик партияси раҳбари Сергей Гайдукевич номзодини қўлловчи 1 907 имзо келиб тушган.
Бу икки номзоддан ташқари, ташаббускор гуруҳлар Бирлашган фуқаролик партияси етакчиси Анатолий Лебедько, “Ҳақиқатни гапир” кампанияси фаоли Татьяна Романовская, Беларусь ватапарварлик партияси етакчиси Николай Улахович, Беларусь сўл “Адолатли дунё” партияси раиси Сергей Калякин номзодлари учун имзо тўпламоқда.
Президентликка ўз номзодини кўрсата олиш учун сиёсатчилар камида 100 минг сайловчининг имзосини тўплаши талаб қилинади.
Имзо тўплаш 21 август куни якунланади. Президентлик сайловлари 11 октябрь куни бўлиб ўтади.
