Америкалик миллиардер ва АҚШ президентлиги учун сайловда номзод ҳисобланмиш Дональд Трамп Айова штатининг Дубьюке шаҳрида ўтказилган матбуот анжумани вақтида Univision телеканали вакили бўлган журналистни тадбир ўтаётган залдан ҳайдаб чиқартирди. Бу ҳақда Рейтер хабар қилган.
Маълум қилинишича, ушбу журналист Трампга ноқонуний муҳожирларнинг АҚШда туғилган фарзандларига фуқаролик берилиши масаласида савол берганидан кейин шундай воқеа рўй берган.
Трамп аввалига ундан ўз навбати келганида савол беришини сўраган, кейинроқ эса қўриқчиларга журналистни олиб чиқиб ташлашни буюрган.
Матбуот анжумани охирида Трамп уни чақиртириб, саволини бошқатдан беришини сўраган. Трамп журналист бу воқеа учун ўзини айбдор ҳис қилиши кераклигини таъкидлаб, унга савол беришда ортиқча ҳиссиётларга берилмасликни тавсия қилган.