Тожикистон ҳукумати террорчилар билан ҳеч қандай музокара олиб бормаяпти. Бу ҳақда Ромитда генерал Абдуҳалим Назарзоданинг тарафдорларига қарши аксилтеррор амалиётини ўтказаётган кучлардаги манбага таянган ҳолда ТАСС агентлиги хабар бермоқда.
“Биз террорчилар билан ҳеч қандай музокаралар ўтказмаяпмиз, агар улар ўз ихтиёрлари билан таслим бўлмасалар, йўқ қилинади”, - деди агентлик суҳбатдоши.
ОАВда ҳукумат исёнчи гуруҳларга ультиматум қўйгани ва музокаралар олиб бораётгани ҳақида хабарлар тарқатган эди. Аммо бу хабарлар инкор қилинмоқда.
Бундан ташқари, кеча прокуратура исёнчи генералга қарши террорчилик ва ватанга хиёнат айбловлари бўйича иш қўзғатилгани маълум қилинди.
Бугунги кунга қадар унинг тарафдорларидан 20 нафари ўлдирилди, 72 нафари қўлга олинди. Ромитда яширинган Назарзода бошчилигидаги 7-8 киши қаршилик кўрсатишда давом этмоқда.