Супероғир вазн тоифасининг WBA, WBO, IBF ва IBO йўналишлари бўйича жаҳон чемпиони украиналик Владимир Кличко жаҳон профессионал боксчиларининг вазн тоифасидан қатъий назар тузилган рейтингида дунёнинг энг яхши боксчиси сифатида рўйхатни биринчи ўрнига кўтарилиб олди. Бу ҳақда Boxrec.com портали хабар тарқатди.
Манбанинг ёзишича, Кличко профессионал боксдаги фаолиятини якунлаган америкалик Флойд Мейвезердан бўшаган биринчи ўринни эгаллаб олган.
Рейтингда иккинчи ўринни ўрта вазн тоифасининг WBA (Super), IBO ва WBC (Interim) йўналишлари бўйича чемпиони қозоғистонлик Геннадий Головкин эгаллаб турибди. Унинг ҳисобида 33 жангда 33 ғалаба (30 нокаут) мавжуд.
Учинчи ўринга мексикалик Сауль Альварес кўтарилиб олган. Боксчи жорий йилнинг 21 ноябрь куни Лас-Вегасда ўрта вазн чемпионлиги учун пуэрто-рикалик Мигел Коттога қарши рингга кўтарилади.
Рейтингда тўртинчи ўринда яримоғир вазн тоифасининг WBA, WBO ва IBF йўналишлари бўйича чемпиони россиялик Сергей Ковалёв эгаллаб турибди. Бешинчи ўринда филлиппинлик Мэнни Пакьяо жойлашган.
Ўзбекистон шарафини ҳимоя қилиб келаётган жаҳон чемпиони Руслан Чагаев мазкур рейтингда 317 очко тўплаган (солиштириш учун – Кличкода 1330 очко) ҳолда 110-ўринда бормоқда. Бу ўзбекистонлик боксчилар ичида энг яхши кўрсаткич саналади.
Маълумот ўрнида таъкидлаб ўтиш жоиз, 39 ёшли украиналик боксчи шу пайтга қадар 64та жангда ғалаба (53 нокаут) қозониб, уч маротаба имкониятни бой бериб қўйган. Атланта-1996 олимпиадаси чемпионининг рингдаги сўнгги мағлубияти 2004 йилга тўғри келади. Кличконинг навбатдаги жангги жорий йилнинг 24 октябрь куни Германияда, британиялик Тайсон Фьюрига қарши кечади.