2015 йилнинг 15 сентябрь куни Ўзбекистон Республикаси ташқи ишлар вазири Абдулазиз Комилов мамлакатимизга ташриф буюрган Ўмон султонлиги Ташқи ишлар вазирлиги бош котиби, савдо-иқтисодий ҳамкорлик бўйича Ўзбекистон-Ўмон Ҳукуматлараро комиссияси ҳамраиси Бадр бин Ҳамад ал-Бусаидийни қабул қилди. Бу ҳақда Ўзбекистон ТИВ хабар берган.
Учрашув чоғида икки томон кун тартибининг долзарб масалалари муҳокама қилинди, халқаро ва минтақавий муаммолар юзасидан фикр алмашилди.
Суҳбат давомида икки давлатнинг манфаатдор вазирлик ва идоралари нуфузли делегациялари иштирокида бўлиб ўтган савдо-иқтисодий ҳамкорлик бўйича Ўзбекистон-Ўмон Ҳукуматлараро комиссиясининг учинчи йиғилиши якунлари ҳам кўриб чиқилди.
Томонлар халқларимиз ўртасидаги маданий-гуманитар соҳадаги алмашинувларни ва анъанавий алоқаларни янада ривожлантиришга тайёр эканликларига урғу бердилар. Шу нуқтаи назардан Тошкент давлат шарқшунослик институти қошида ташкил этилаётган Абу Райҳон Беруний номидаги Шарқ қўлёзмалари маркази тамал тошини қўйишда Ўмон делегацияси иштироки чуқур рамзий маънога эга.
Учрашувда Ўмон элчиси Муҳаммад бин Саид бин Муҳаммад ал-Лаватий иштирок этди.