Хитойнинг Янчжоу шаҳрида яшовчи хитойлик йигит iPhone 6s смартфони сотиб олиш учун буйрагидан воз кечмоқчи бўлди. Бу ҳақда China Daily газетаси маълум қилди.
Қайд этилишича, У фамилияли бу хитойликка бу фикрни унинг Хуан исмли дўсти уқтирган.
Йигитлар интернет орқали ноқонуний тарзда тана аъзоларини харид қилувчи агентни топишган. Агент Удан Нанкин шаҳридаги шифохонада тиббий кўрикдан ўтишни сўраган. Шу ернинг ўзида улар агент билан кўришишлари керак бўлган, бироқ харидор келмаган.
Шундан кейин У буйрагини сотиш фикридан қайтган. У бу ҳақда дўстига айтганда, дўсти битимни бекор қилишни истамай, тихирлик қилавергач, У полицияга мурожаат қилишга мажбур бўлган. Ҳуқуқ-тартибот муассасалари ходимлари ғойиб бўлган Хуанни ушлай олишмаган.
2013 йилнинг октябрида шанхайлик эр-хотин iPhone сотиб олиш учун қизини сотгани маълум қилинган эди. Ўшанда ҳеч қаерда ишламайдиган эр-хотин ҳали дунёга келмаган қизини сотиш ҳақида интернетда эълон жойлаштирган.