АҚШда тез тайёр бўлувчи таомлар таклиф этувчи Whataburger ресторани ходими 2 нафар полициячига хизмат кўрсатишдан бош тортгани туфайли ишдан бўшатилди. Бу ҳақда New York Daily News хабар ёзган.
Полициячилардан бири Майкл Маговерннинг айтишича, улар ресторанга кириб ўтиришлари биланоқ, буюртма беришга улгурмасларидан ходимлардан бири келиб, "Бизда полициячиларга хизмат кўрсатилмайди", деган.
Иккинчи полициячи Уэмерон Бекхэм бу гапни эшитганида қулоқларига ишонмай турган.
Аввалига полициячилар бу ходимнинг ҳазиллашаётганини тахмин қилишган. Лекин у индамасдан уларнинг олдидан кетган.
"Биласизми, мен 17 йил ўт ўчириш хизматида ишлаганман. 13 йилдан буён полиция офицериман, лекин менга нисбатан бундай муносабатда бўлишмаганди", дейди Маговерн.
Ўз навбатида Whataburger ресторанидагилар ушбу ноқулайлик учун мижозлардан узр сўрашган ва одобсиз ходимнинг ишдан бўшатиб юборилганини маълум қилишган.