19 сентябрда британиялик ёзувчи ва актриса Жоан Коллинзнинг синглиси, бир неча бестселлерлар муаллифи, ёзувчи Жеки Коллинз 78 ёшида кўкрак саратонидан оламдан кўз юмди. Бу ҳақда ёзувчи оиласига иқтибос келтирган ҳолда Reuters ахборот агентлиги маълум қилди.
Жаклин Жилл Коллинз 1937 йилда Лондонда рақс ўқитувчиси ва театр агентининг оиласида дунёга келган. Бўлғуси ёзувчини 15 ёшида мактабдан четлатишган ва у шундан кейин опаси Жоан билан Голливудни забт этиш учун йўл олган.
1950-йилларда Коллинз ITC Entertainment телеканалининг бир нечта мини-сериалларида роллар ижро этиб юрган, бироқ кейин адабиётга қизиқиб қолган.
1968 йилда ёзувчининг “Дунё турмуш қурган эркакларга тўла” (The World Is Full of Married Men) номли асари чоп этилди.
Ёзувчининг “Айғир от” (The Stud) номли иккинчи асари эса бестселлерга айланди.
1974 йилда Коллинзнинг “Ошиқ-маъшуқ қотиллар” (The Love Killers) номли илк криминал романи чоп этилди. 1980-йилларда Коллинз оиласи билан бирга Лос-Анжелесга кўчиб ўтди.
Адибнинг “Голливудлик рафиқалар” (1983) асари The New York Times нашрининг бестселлерлар рўйхатидан биринчи ўринни эгаллаб, 15 млн нусхада сотилди ва унинг энг машҳур асарига айланди.
Коллинз уч марта турмушга чиққан. Турли турмушлардан уч нафар қиз фарзанди бор.