«АвтоВАЗ» Lada Priora оиласи автомобилларини ишлаб чиқаришни тўхтатди. Моделни йиғиш ишлари октябрдан аввал бошланмайди. Бу ҳақда корхона матбуот хизматига асосланиб, саrzone.uz хабар бермоқда.
«Вазият жуда оддий, ҳеч қандай ғайритабиийлик йўқ. Заводнинг ишлаб чиқариш жадвали бозор талаблари ва дилерлик тармоқларининг буюртмалари асосида шакллантирилади — бу барча моделларга, хусусан, Lada Priora’га ҳам тааллуқли. Ишлаб чиқаришнинг сентябрь ойи режаси бажариб бўлинди», — деди «АвтоВАЗ» вакили.
«Ведомости» газетасининг ўз манбаларига асосланиб хабар беришича, «Приора»ларнинг ишлаб чиқарилишини қайта йўлга қўйиш катта сўроқ остида турибди. Бу модель савдосининг жуда пастлиги ва тез орада Lada Vesta’нинг седан версияси сотувга чиқиши билан боғлиқ.
«Ведомости» суҳбатдошларининг қайд этишича, «АвтоВАЗ» «Приора»ни чекланган миқдорда ишлаб чиқариш ва бошқа корхоналар, масалан, «Чеченавто» томонидан йиғилаётган моделлар учун эҳтиёт қисмлар етказиб беришга тайёр.
Аввалроқ Lada Priora’ни ишлаб чиқариш жараёни 2018 йилга қадар давом этиши ҳақида хабар берилган эди. Бундан ташқари, модель рестайлинг қилиниши ҳам кутилмоқда эди. Янгиланишдан сўнг «Приора» Lada XRay ва Vesta ўхшашроқ бўлиши керак эди.
Шунингдек, ОАВда шу моделни ишлаб чиқариш тўхтатилиши туфайли “АвтоВАЗ” 15 минг ходимини қисқартиришни режалаштираётгани ҳақида маълумот пайдо бўлган эди.