АҚШнинг патент бюроси Boeing компаниясига шовқинни электр энергияга айлантира олувчи тизимга патент берди.
Патентда кўрсатилишича, тизим бир нечта элементлардан тузилган. Самолётларнинг учиш-қўниш йўлаклари бўйлаб бир-биридан бир хил узоқликдаги масофада самолёт двигателининг товуш тебранишларини тута олувчи акустик йиғгичлар ўрнатилиши керак. Шовқин насосга ўхшаб пардани тебрантирадиган ўзгартирувчи камера орқали ўтади. Камера пастга ҳаракатланганда ҳавони турбинага итаради. Турбина редуктор орқали генераторни айлантиради. Олинган электр энергия аккумуляторда йиғилади.
Патентда бу усул билан қандай миқдордаги электр энергия олиниши кўрсатилмаган, унда фақатгина унинг миқдори шовқин даражасига тўғри пропорционал эканлиги, яъни шовқин қанча кучли бўлса, олинаётган электр энергияси шунчалик кўпроқ бўлиши айтилмоқда.