Англия Премьер-лигаси 8-туридан ўрин олган “Манчестер Сити”-“Ньюкасл” учрашувида “шаҳарликлар” ҳужумчиси Серхио Агуэро премьер-лиганинг янги рекордини ўрнатди. Футболчи рақиб дарвозасига 20 дақиқа ичида, яъни 42, 49, 50, 60 ва 62-дақиқаларда 5 та гол уришга муваффақ бўлди. Футболчи охирги голини ургандан кейин Вильфрид Бони билан алмаштирилди
Учрашув “Сити”нинг 6:1 ҳисобидаги йирик ғалабаси билан якунланди.
Аргентиналик футболчи АПЛ тарихида бир учрашувда 5 та тўп киритишга муваффақ бўлган 5-ўйинчи бўлди. Унгача пента-трикка Жермейн Дефо (36 дақиқа ичида), Алан Ширер (54), Энди Коул (65) ва Димитар Бербатов (68) эриша олган.
Агуэронинг рекордигача айнан Жермейн Дефонинг пента-трики энг тез амалга оширилган пента-трик ҳисобланарди. Футболчи бундай натижага 2009 йилнинг ноябрида “Уиган”га қарши учрашувда (9:1) эришиб, буни 36 дақиқа ичида амалга оширганди.
27 ёшли Агуэро “Манчестер Сити” таркибида 2011 йил июлдан бери тўп суриб келади. У шу кунгача клуб таркибида 128 та ўйинда майдонга тушиб, ўз ҳисобига 84 та гол ёзиб қўйган.