Англиянинг «Сандерленд» футбол клуби бош мураббийи Сэм Эллардайс ўзининг «Катта Сэм» китобида «Арсенал» бош мураббийи Арсен Венгер билан ўзаро муносабатлари ҳақида ҳам тўхталиб ўтган.
«Мен «Болтон»ни бошқарган пайтларимда ҳаммасидан ҳам кўпроқ «Арсенал»ни ютишни яхши кўрардим. Биз уларга ҳақиқий бошоғриқ бўлардик ва Венгернинг бизни кўрарга кўзи йўқ эди. «Хайбери»даги учрашувлардан бирида дуранг қайд этилгач, у ўйиндан кейин менга қўл бериб кўришишни истамаганди. Ўшанда унинг бўйинбоғини ечиб йиртиб ташлагани ва уни майдонга улоқтирганига гувоҳ бўлгандим.
Венгер ҳамма нарсани юрагига яқин оладиган инсон эди. Унда кибр жуда юқори эди. Аниқ айтаманки, у ўйиндан кейин кабинетингизга бир қултум ичгани таклиф қилинадиган одам эмасди.
Қанчалик унинг жиғига тегсам, бу менга шунча кўпроқ ёқарди. У матбуот орқали ҳакамларни хато қилганини, бизнинг жамоа ўта қўпол ўйнаганию, ўз жамоасини фақат футбол ўйнагани ҳақида таассурот уйғотишга ҳаракат қиларди. У худди унинг шогирдлари тўп билан хоҳлаган ишини қилсаю, биз уларга қарши ҳеч қандай ҳаракат қилмаслигимизни истагандек кўринарди.
Аслида, рақибнинг камчилигини топа билиш ва ундан фойдаланишни эплаш керак бўлади. Одатда биз уларни мағлубиятга учратган учрашувларда матбуот асосан «Арсенал» эҳтиёт бўлиб ўйнагани ва ҳакамлар ўта юмшоқ муносабатда бўлгани ҳақида ёзарди», – дея сўзлаб берган Эллардайс.