Испания чемпионатининг 6-турида "Лас-Пальмас"га қарши ўйинда жароҳат олиб, 6-8 ҳафта муддатга сафдан чиққани айтилган Лионель Месси Аргентина терма жамоасининг ЖЧ-2018 саралаши доирасида 13 ноябрь куни Бразилияга қарши ўтказадиган муҳим ўйинида иштирок эта олмайди. Бу ҳақда Sport.es нашри хабар тарқатган.
Хабарда айтилишича, у тиззасидаги жароҳатидан бу муддатгача фориғ бўла олмаслиги аён бўлди.
Месси Колумбия терма жамоасига қарши 17 ноябрь куни ўтказиладиган ўйинни ҳам ўтказиб юборади.
16 октябрь куни аргентиналиклар 28 ёшли футболчининг жароҳатларидан даволаниш жараёнини тезлаштирмоқчи ва уни бразилияликларга қарши ўйинда майдонга туширмоқчи бўлаётгани айтилганди.
Ўз навбатида ҳужумчининг жамоаси "Барселона" бунга қарши чиққан. Каталонияликлар Мессининг жароҳатидан тўлиқ фориғ бўлмасдан туриб, Бразилияга қарши ўйинда майдонга тушиши ва бу ўйинда жароҳатини янгилаб олишидан хавотир олишган.
Ундан олдинроқ эса, Месси 21 ноябрь куни "Реал" ва "Барселона" ўртасидаги "эл класико" баҳсигача сафга қайтиши мумкинлиги ҳақида хабар берилганди.