Лиссабон — Дублин рейси бўйича парвоз қилаётган самолётнинг жазава вақтида унга ёрдам бермоқчи бўлган ҳамроҳини тишлаб, бир оздан сўнг ҳаётдан кўз юмган йўловчиси танасидан ичига номаълум моддалар солинган контейнерлар мавжудли аниқланди, дея хабар берди Ирландиянинг RTE телеканали.
Ҳодиса 19 октябрь куни Ирландиянинг йирик Aer Lingus авиаташувчиси рейсида содир бўлган эди. Экипаж капитани 24 ёшли португалиялик йўловчи жазавадан сўнг хушини йўқотгани сабабли Корк халқаро аэропортига фавқулодда қўнишни амалга оширишга рухсат сўраб мурожаат қилган эди. Аэропортга етиб келган шифокорлар эса ёш йўловчининг ўлимини қайд этишди.
RTE маълумотларига кўра, экспертлар унинг ичидан бир неча контейнер борлигини аниқлашди, улардан бири очилиб кетган экан. Идишчалар суд экспертизасига юборилди.
Ёш йўловчи ўлимига олиб келган аниқ сабаб суд экспертизаси текширувлари ва токсикологик тестлардан сўнг ошкор қилинади.
RTE`нинг қайд этишича, худди шу рейсда парвоз қилган 40 ёшли аёл ҳам ёнида амфетамин олиб кетаётгани аниқлангани сабабли сўроқ қилинмоқда.