Британиялик автопойгачи «Мерседес» жамоаси аъзоси Льюис Ҳэмилтон «Формула-1» мусобақаларида чемпионлик унвони бўйича ўзининг кумири бразилиялик марҳум спортчи Айртон Сеннани ортда қолдирди. Бу ҳақда РИА «Новости» нашри хабар тарқатмоқда.
Якшанба куни Ҳэмилтон АҚШ Гран-присида маррага биринчи бўлиб етиб келди ва уч карра жаҳон чемпионига айланди. Британиялик спортчи ҳисобида ҳозирда 327 очко бор ва қолган учта босқичда ўзининг рақобатчилари — Себастьян Феттель («Феррари») ва Нико Росбергни («Мерседес») етиб бўлмайдиган фарқ билан ортда қолдириб кетди. Натижада Ҳэмилтон мазкур мусобақалар тарихида уч маротаба чемпионликни қўлга киритган ўнинчи пойгачига айланди.
2014 йилги мусобақаларда Ҳэмилтон Росберг билан бош соврин учун кураш олиб борган ва фақатгина сўнгги босқичдагина ғалабани қўлга кирита олганди.
Сочидаги босқичда Ҳэмилтон ўзининг босқичлардаги 42-ғалабасини қўлга киритган ва Айртон Сеннани ортда қолдирганди. АҚШдаги босқич ғолиблигидан кейин британиялик спортчи Феттелни (42) ортда қолдирди ва бу борада учинчи кўрсаткични қайд этмоқда. Ҳэмилтондан юқорироқ натижани фақатгина Ален Прост (51) ва афсонавий Михаэл Шумахер қайд этишган (91).