Сурия ҳукуматининг фикрича, Саудия Арабистони ва у бошчилик қилаётган ҳусийчиларга қарши коалиция ИШИД жангариларини Ямандаги урушга жўнатиш учун Суриядан олиб чиқиб кетмоқда, деб хабар бермоқда РИА “Новости” ахборот агентлиги.
“Разведка маълумотларига кўра, 26 октябрда Адан аэропортига Туркиядан 4та самолёт келди. Улардан иккитаси турк авиалинияларига, биттаси Қатар авиалинияларига ва яна биттаси БАА авиалинияларига тегишли бўлган. Бу самолётларнинг бортларида ИШИДнинг 500 нафардан кўпроқ жангариси бўлган, улар Суриядан Россия авиазарбаларидан қутқариш мақсадида олиб чиқилган”, деб айтди Сурия Қуролли кучлари вакили Али Майхуб.
Майхубнинг таъкидлашича, операцияни Саудия Арабистони бошчилигидаги коалиция зобитлари амалга оширган. Зобитлар жангариларни Яман ва Саудия Арабистонининг турли вилоятларига олиб кетишган.
“Жангарилар охирги кунларда ҳусийчилар билан жангларда катта талофат кўрган коалициянинг қуруқликдаги операцияларида иштирок этишлари керак. Мавжуд маълумотларга кўра, ИШИД жангариларини Суриядан олиб чиқиб кетиш бўйича операциялар яқин орада давом эттирилади”, деб айтди Майхуб.