26 октябрь куни маркази Афғонистонда бўлган 7,5 магнитудали зилзила туфайли Осиё жанубидаги ҳудудларда ҳалок бўлганларнинг жами сони 385 нафарни ташкил этмоқда. Бу ҳақда Associated Press хабар берган.
Покистоннинг ўзида зилзила туфайли 267 кишининг ҳалок бўлгани тасдиқланган. Афғонистонда эса 115 нафар киши ушбу табиий офат қурбони бўлган. Шунингдек, Ҳиндистон ва Непалда ҳам таъсири сезилган зилзила бу мамлакатларга ҳам талофат етказган.
Покистонда зилзила 10 мингдан ортиқ уйни ер билан битта қилгани айтилган.
Эслатиб ўтамиз, Афғонистонда 26 октябрь куни 7,5 балли ер қимирлаши содир бўлди. Унинг таъсири Ўрта Осиёнинг бошқа республикаларида ҳам сезилди. Кўплаб шаҳар ва қишлоқларда аҳолининг уйлари, мактаблар ва бошқа бинолар шикастланди.
Зилзила маркази Афғонистон пойтахтидан шимоли-шарқий томонга 259 км узоқликда Ҳиндукуш тоғларида, ўчоғи 190 км чуқурликда бўлган.