Мисрда фалокатга учраган Россия самолёти иккинчи учувчиси Сергей Трухачёвнинг собиқ рафиқаси Наталья Трухачёва учувчи парвоз олдидан самолётнинг техник ҳолатидан шикоят қилганини маълум қилди. У бу ҳақда “НТВ” телеканали эфирида айтиб ўтди.
“Катта қизим собиқ эрим учишидан олдин у билан телефон орқали суҳбатлашган. У парвоз олдидан самолётнинг техник ҳолати унча ҳам яхши эмаслигидан шикоят қилган”, деб айтди аёл.
Аввалроқ лайнер техник носозлик сабабли қулагани маълум қилинганди. Мисрнинг аэропортлар бўйича компанияси бошлиғи Одил Махғуб самолёт аэропортда зарурий техник текширувдан ўтганини таъкидламоқда.
Шарм-аш-Шайҳ курорт шаҳридан Санкт-Петербургга учиб кетаётган Metrojet (“Когалымавиа”) компаниясининг самолёти ҳавога кўтарилгандан кейин 24 дақиқа ўтиб фалокатга учраган. Бу вақтгача самолёт 9 минг метр баландликка қўтарилишга улгурган. Самолёт бортидаги барча 224 киши ҳалок бўлган.