Олмалиқ тоғ-металлургия комбинати “Қалмақир” конида комбинатнинг асосий хомашё базасини кенгайтириш бўйича лойиҳани амалга оширишни бошлади. Бу ҳақда Sputnik нашри маълум қилди.
Лойиҳа балансдан ташқари мис рудаси карьерини қазишни кўзда тутади. Бу 2017 йилга қадар 4 млн тонна хомашёни қўшимча қайта ишлашга имкон беради. Лойиҳа қисқа муддатли истиқболда мис ишлаб чиқариш ҳажмини 3-4 фоизга оширишга имкон беради.
101,1 млн долларлик лойиҳани молиялаштириш Ўзбекистон реконструкция ва тараққиёт жамғармасининг 41,3 млн долларлик, Ўзбекистон банкларининг 40,3 млн долларлик кредитлари ва комбинатнинг 19,4 млн долларлик ўз маблағлари ҳисобига амалга оширилади.
“Қалмақир” конида қазиш ишлари 1954 йилдан олиб борилади. Коннинг бугунги кундаги ишлаб чиқариш қуввати йилига 31,5 млн тонна рудани ташкил қилади. 2007 йил январь ҳолатига кўра, коннинг геологик захиралари 6,15 млн тонна мис, 98,4 минг тонна молибденни тшкил қилган. 2012 йилда комбинат конни кенгайтириш бўйича 122,2 млн долларлик лойиҳани ўз якунига етказган эди.
Олмалиқ тоғ- металлургия комбинати Ўзбекистонда мис ишлаб чиқарувчи ягона корхона ҳисобланади.