Тошкент шаҳрида ногироннинг нафақа пулини тўлашни пайсалга солган инспекторга интизомий жазо қўлланилди. Бу ҳақда “Даракчи” газетаси ёзмоқда.
III гуруҳ ногирони Малоҳат Ғаниева ОАВга мурожаат йўллаб, унинг I гуруҳ ногирони бўлган турмуш ўртоғи “айрим масъулиятсизлар” томонидан пенсиясиз қолдирилганини таъкидлади.
“Туман ижтимоий таъминот бўлимидагилар ўғлим 18 ёшга тўлгани учун пенсия пулидан чегирма қилиниб, қолгани тўланишини айтишди. Рози бўлдим. Аммо қолганини ҳам тўлашмади. Йўл қўйган қўпол хатоларини бир-бирларига тўнкаб, вазиятдан чиқишга уринишди. Охири қилган хатоларини англаб, кейинги тўловларда қўшиб берилишини айтишди. Аммо бўш қоп тик турмайди. Уларнинг йўл қўйган хатоси учун бизнинг оила бир ой қийналиб яшаши керакми? Илтимос бу мурожаатга бепарво бўлманг. Уларга албатта чора кўрилиши керак”, - дейилади мактубда.
Бу воқеага Тошкент шаҳар прокурори биринчи ўринбосари, адлия катта маслаҳатчиси М. Мирзаев изоҳ берди.
“Аниқланишича, фуқаро А. Ғаниевага жорий йилнинг май ойи учун тўланиши лозим бўлган пенсия пули бюджетдан ташқари Пенсия жамғармаси Чилонзор тумани бўлимининг пенсия ва нафақалар тўлови мониторинги 1-тоифали инспектори Ю. Суюнова ўз ишига масъулиятсизлик билан ёндашганлиги натижасида рўйхатга киритилмасдан қолган”, - таъкидлади у.
Бундан ташқари, Ю. Суюновага нисбатан интизомий чора кўрилиб, у ўртача ойлик иш ҳақига 10 фоиз миқдорида жарима интизомий жазо чораси қўлланилганини, жабрланувчиларга эса пенсия ва компенсация ҳисобига 1 558 718 сўм тўлаб берилгани хабар қилинди.